抵食街坊小炒 - 大角咀萬發海鮮火鍋菜館

感言 - 唏噓、無奈

近期VS香港飲食區發生了少少事情
引致了原本這都唔算人流太少的版區突然變得暮氣沉沉
報告少了、回應亦少了
kt 祇是在這飲食區掛吓單，有空時吹吓水、有空時出番一兩個飲食報告的邊緣份子
但眼見香港飲食區出現這情況亦都心有戚戚然
感到唏噓、感到無奈
而且.....在過去幾星期，連在這區吹水的意慾亦大幅下降{:soso_e127:}

今日..... kt 承認.........
我唔捨得在這區認識，但素未謀面的象版大老爺 (尤其係佢嘅粗口)
我唔捨得在這區一齊吹水，講飲講食的師兄弟們
我更加唔捨得以往大家在這區落過的心機感情就此人間蒸發{:soso_e109:}
所以......kt 嘗試再出點力，出個報告
希望喚回一些對此區有興趣，有感情的師兄弟再次出現
一齊努力尋回往日開心出報告、開心吹水的日子！

報告

心底話講完，就言歸正傳.......出報告
數星期前，kt 相約幾位舊同事聚舊
其中一位我稱呼他 "食癡" 的同事強力推介一間抵食的街坊小炒館子
位處大角咀詩歌舞街的......萬發海鮮火鍋菜館
好誇張，"食癡"話我知呢間野好好生意
要預先一星期訂位，係咪咁巴閉？
咁 kt 梗係要去試場試場啦 :em11:


某閒日晚上七時，天都未黑，拿拿臨影張外貌相先
在詩歌舞街，你一眼就會見到呢間食肆
因為.....全條街門面最長最大係佢，人流最多都係佢


再影張門口相
唔記得講，這條詩歌舞街晚上唔太繁忙
出便亦有好多錶位，對揸車去食的大款好方便
"食癡" 話我知，如果冇錶位泊，就咁將架車泊喺食肆門口都有人幫你睇水的 :y-17:


有冇呃你？閒日七點都真係爆棚架！
以街坊小館的準則，萬發海鮮火鍋菜館的環境、清潔度、樓面服務都.....全部合格！


成班友仔你一言我一語商量緊食乜野
kt 唔Q理佢哋，影吓個菜牌先


話明火鍋菜館，梗係要影吓有乜火鍋湯底啦！
又係"食癡" 話我知，呢度最出名係豬肚雞，要預早幾日訂先得
kt 嗰晚真係見有兩夫婦 order 咗一個豬肚雞火煱
但係就唔係用嚟打邊爐，係用嚟當湯飲當餸食
見佢哋祇係炒碟菜，趙埋個豬肚雞，飲埋個湯，咁就好美味嘅一餐喇{:soso_e201:}

口水多過茶，講極都未入正題
都係快手D起菜啦，睇相...........


第一度餸........豉椒炒蜆
成班友仔有男有女，但係全部都係蝗蟲一樣餓鬼投胎
碟蜆一落枱個個飛擒大咬.......頂！我都未影相{:soso_e135:}

講番碟蜆，好入味好好味
惟一美中不足係蜆本身唔夠大隻，亦唔係太鮮甜
不過廚師手藝同汁獻搭夠
58蚊算抵食喇！唔可以投訴了


第二度餸........金黄九肚魚
即係炸九肚魚配鹹蛋王獻汁
老老實實，呢款三高危險食物真係幾好味
九肚魚外皮炸得金黃香脆，但內心魚肉鮮味仍然保持到
送飯送酒都啱的一度餸，唔錯！
今次輻相冇得賴班友仔
係自已掛住食，成碟餸食到一半先記得影相:y-47:


呢度餸係我點嘅，因為係 kt 的至愛 ----- 魚腸焗蛋
一上枱，某個死仔即時夾咗一角去，炳佢都冇用，正死仔！餓鬼投胎！
講個餸，唔錯，幾多魚腸，又有陣陣果皮香味
味道真係幾傳統，係 kt 想追求那種懷舊感覺
惟一美中不足，係面頭嘅蛋焗得好金黃好香口
但入面心嘅魚腸蛋畧嫌欠少少火路，畧濕了少許
我知，這些祇是 kt 個人口味問題而矣，整體上呢個餸 kt 俾90分以上{:soso_e179:}


第四度餸-----豉椒鵝腸
老老實實，呢度菜好普通
賣相唔靚，洋葱切到一舊舊，厨房刀功好求其
鵝腸細條，份量亦少
惟一好處上枱時鑊氣尚可
大路之作，唔會推介


再嚟一個例牌乳豬，呢個燒味掂{:soso_e189:}
點解會叫呢碟乳豬？
就係因為見到廚房掛住幾隻未燒嘅乳豬
夜晚七點幾都未燒，但又準備好哂........
咁，推理之下覺得佢地當晚應該會燒埋佢
一晚賣幾隻豬，仲唔係好野名菜？所以.......即點:y-17:
推理正確，隻乳豬外皮燒得好脆 (睇相都睇到啦 :em11:)
仲要D肉唔肥，而直醃得好入味
kt 強力推介之作！


第六度餸------薯仔牛柳粒
唔好睇少呢碟野，雖然材料配搭看似普通，但呢個餸係萬發嘅名菜嚟！
除了牛柳粒味道濃，入口鬆軟唔韌外
原來薯仔先係呢度菜的精華所在
薯仔應該用咗蜜糖汁浸過，然後再落鑊爆熟
所以薯仔食起嚟好香好甜，真係非一般食法
班死仔死女用行動幫手評分
個個搶哂食薯仔先，然後先再清牛柳粒！:y-47:


第七度餸------雪裏紅石頭鍋芥蘭
又係一個幾特別的配搭
雪裏紅即係雪菜，一上枱時有雪但沒見紅，如果紅椒鋪面就符合個餸名喇！:y-17:


其實唔係冇紅椒，係要翻起的雪先見紅啫......
講番個餸.......真係聲、色、味、香全部有齊
聲----石頭鍋上枱時仲"滋滋咋咋"，先聲奪人！
色---- 一翻起雪菜，芥蘭的綠，辣椒的紅，賣相良好 (如果多幾條紅椒仲正)！
味---- 雪菜的咸味，配上芥蘭的鮮味，好！仲有....在鍋中的芥蘭，煑得輭硬適中，火喉剛剛好，讚！
香---- 石頭鍋的熱力，確實逼出了雪菜比較濃烈的香氣，撲鼻而來！
kt 咁詳細的分析，你話我對呢度餸有幾滿意喇！:em20:


最後一味 ----- 萬發石頭鍋飯
睇相靚唔靚？
一個平凡用料 (其實類似福建炒飯的配料)，但加上厨師的心思技藝
再配上石頭鍋，整個飯都時尚得多了！
班衰仔衰女，雖然把口就話飽到上心口
但實際行動卻係用咗唔夠五分鐘就好似蝗蟲咁消滅哂成鍋飯 :y-47:

最後飲飽食醉.......要埋單喇
食野時班友仔就唔識乜野叫尊師重道，食野速度快到連相都唔俾 kt 影
但埋單時就突然醒覺，話要敬老有大食大，咁即係恰我呢個老人家啫，頂！:em1:
以上咁多個餸，加埋汽水啤酒........埋單盛惠六百三十幾！你哋話抵唔抵喇？

好！嚟個總結.........
話明街坊小炒，今次 kt 食嘅全部都唔係乜野名貴菜式
但 kt 幾滿意，除咗同幾個同事天南地北開心吹水外
呢間萬發嘅小菜，無論味道，心思，價錢，服務等都令人滿意
一頓開心的街坊小炒晚飯就在開懷情況下結束！:em17:

再度感言

報告出了，kt 是用心寫的
報告出了，但 kt 唔知有幾多回應
報告出了， kt 甚至唔知有冇其他版主/超版加分

但 kt 唔介意，因為.......
報告出了，代表 kt 盡了努力
報告出了，代表 kt 講咗我想講的心底話

那樣，又是一句老話，一切隨緣吧！
希望有師兄弟多一些的回應，讓香港飲食版區有多一些人氣，有多一些生氣吧！
更希望有版主 (尤其是那位粗口滿天飛的.......)加分俾 kt 吧！

多謝KT兄真情的報告，好感動！
感動並非菜式有幾好食，價錢有幾抵食，
能感動人心的係KT兄那份心意、熱情，
我最近都無時間出報告，都係果句生活迫人，
請見諒！

睇完！多謝報告~

無爭有為 發表於 2012-7-9 00:24

                               
登录/注册后可看大图

多謝KT兄真情的報告，好感動！
感動並非菜式有幾好食，價錢有幾抵食，
能感動人心的係KT兄那份心意、熱情， ...

其實無爭兄唔駛講乜野見諒唔見諒
大家都有正常工作
得閒就出番個報告
忙就吹一兩句水都可以
kt 見到無爭兄嘅回帖都好開心好溫暖
你都係香港飲食區嘅中堅份子
有你嘅回帖，kt 個心都定番D

小弟唔知香港飲食區發生過什麼事
不過kt有心報告
小弟一定支持
有機會小弟都出返個飲食報告支持下

講返個報告
小弟一直都很喜歡去呢d街坊小炒餐廳
一來價錢平
二來一班朋友可以毫無顧忌咁大說大笑
真係一樂也
呢間大角咀既餐館我未去過
以前去親大角咀都係打邊爐 / 去街市熟食中心多
下次去開又多一個選擇
睇賣相
我尤其喜歡牛柳粒同埋個石頭鍋飯
另外個介蘭都好唔錯
多謝kt報告
下次一定要試

整乜鬼碟碟都係我最中意食架！
不如下次聚餐，改去呢度0羅！
d野好0岩食喎！

真係唔錯, 不過真係好多人, 經常要等位
多謝kt用心報告分享

SmallD 發表於 2012-7-9 23:36

                               
登录/注册后可看大图

整乜鬼碟碟都係我最中意食架！
不如下次聚餐，改去呢度0羅！
d野好0岩食喎！ ...

好喎:em20:
以我睇法，除咗環境之外
萬發嘅食物無論味道同價錢都好過我哋上次聚餐嗰間
不過.......呢間野唔近火車線喎.......有人食完飯冇咁方便呀

kt1997kt 發表於 2012-7-10 14:44

                               
登录/注册后可看大图

好喎
以我睇法，除咗環境之外
萬發嘅食物無論味道同價錢都好過我哋上次聚餐嗰間

都唔一定唔方便，到時大家夾一夾
真係唔得就搵過第2間
最緊要係食物好0岩口味嘛！

我係外面版面一睇到個題目就走入黎
呢間係係近年有咩大少少既事要聚餐既必選之一
佢有好幾間分店，菜色都有少少唔同
佢地菜碟碟都係大碼
而且做法係同一般例牌菜係有D手功同花巧

呢間只有佢有既係佢既甜品「桂花糕」非常清香+大大件
薯仔牛柳粒就間間都有+每次去必點，D薯仔係用焦糖炒過+大大粒牛柳，真係堅得
石頭鍋飯就好咸下，其實呢度樣樣都幾重口味架，唔食得咸就真係好唔慣
個芥蘭就要睇果日既師傅，有次食到係好梅好難食，但有時又D雪菜真係好香