本帖最後由 chulo2009 於 2012-5-17 14:44 編輯
我有個老友喺大埔長大。
近十幾年已搬到去港島住。
但佢幾乎每個月都會揸車番入大埔搵嘢食。
佢話對"家鄉"美食好有歸屬感。
兩年前跟佢到大埔熟食中心開餐。
食到個肚撐到要爆咁滯。
但最後碟炸豬扒,令我念念不忘。
呢日,見橫掂有事要入大埔,提早少少出發。
坐火車到大埔墟站,由A2出口步行唔駛十分鐘。
自己失魂,落雨冇帶遮。
好彩由車站到大埔綜合大樓,沿途90%都有瓦遮頭。
只係到咗馬路對面行人路要冒雨濕一陣身過馬路。
呢座大埔綜合大樓認真夠派頭,外觀美侖美奐。
地下係街市,一樓係賣生果、乾雜貨。
二樓就係我今次嘅目的地 - 熟食中心。
上去搵食,唔駛經街市,有行人電梯及升降機直達,可以避開街市的魚腥味。
熟食中心面積都幾大,地方好企理,食檔數目都好多。
雖然有心目中要幫襯的食檔,不過我都刻意兜一轉睇睇。
食檔雖多,都係以賣粥粉麵為主。
今次幫襯的係"東記上海麵"。
我想食嘅唔係上海麵,而係佢地嘅招牌炸豬扒。
一盒豬扒要成60蚊。
如果叫個$19粉麵,加多6蚊就可以拼豬扒。
一盒一個人冇可能食得晒,就要個菜肉雲吞河拼豬扒。
個河粉先上,四粒雲吞,兩條大菜芯。
河粉冇淥得過淋,以19蚊計,冇嘢投訴。
五分鐘後,主角到。
新鮮滾熱辣啱啱炸起,睇見都流口水。
諗唔到加6蚊塊豬扒咁鬼大,抵呀!
如果60蚊盒有10塊,嘩!點食得晒,好彩冇貪心啫。
拿拿林咬一啖。
好香嘅南乳味!
豬扒厚一公分(唔計漿皮),唔厚唔薄,炸得啱啱好。
平民嘢,一定係雪藏貨色,不過炸得唔乾唔韌。
豬扒邊條肥膏仲喺度。
精華呀!
唔怪得知咁鬆香美味。
顧住食主菜,碗配菜河粉終於食剩半碗。
兩年的思念得到慰藉,好滿足咁離開。
臨走前留意到雞翼都係佢地招牌菜。
好,一於下次換過口味點雞翼鐘。
又或者起個雙飛,兩樣都唔放過。
進食期間,店家有問我飲唔飲嘢。
我冇叫飲品,因為我打算搵個茶檔飲杯咖啡。
印象中,呢度D茶檔奶茶咖啡都有水準。
吓?!點解所有茶檔都冇開㗎?
算啦,橫掂仲有時間,速速離開熟食中心,搵間茶餐廳嘆番杯熱咖啡。
飲埋呢杯咖啡,至講得功德圓滿。
|