本帖最後由 chulo2009 於 2012-5-2 14:31 編輯
五一,我冇假放。
因為要全日全天候侍奉主子。
中午,俾咗碗飽飯我食之後,我奉命去洗廁所。{:soso__12976757383136705816_3:}
問我係咪外傭放咗假?
有我,我主人駛乜花錢請外傭!{:soso__716685379445744030_4:}
皇恩浩蕩,主子答應陪我出街食下嘢。{:soso__10227036802351553728_1:}
好嘢!今晚唔駛洗碗!
下午茶時間剛過,晚飯時間又早得滯。
只好安慰自己,嚟個EARLY DINNER,搵位泊車都容易啲。
揸住架錢七,得主子預先批准,兀下兀下就車咗去大坑。
發達!發達!唔單只搵到車位,上手仲有一個半鐘頭剩,嘩!執到錢呀!
原本諗住慳慳地,去順興或者炳記,點知兩間茶檔都冇開。
轉去民聲啦,聽講佢地啲蒸肉餅好得。
又冇開,門口貼住,話要避開食環署突擊檢查後至會開鋪。
冇著落,只好陪住主人兜個圈睇下。
五點過啲,好多店仲未開晚市。
見到X車頭,名大於實,賣越南菜,但個湯河都未做得好,唔知點解仲咁多人幫襯?{:soso__4852014199646790012_4:}
經過達X日式拉麵,未開市,就算開咗,請我都唔入。{:soso__14169623249776447259_4:}
佢地嘅豚肉冇錯煮得好好食,但個湯底就…只得個濃字。
見到達X過少少有間泰菜小店,不如就平平地試呢間。
間鋪好細,幾張細摺檯,估計最多坐十個人。
餐牌貼在牆上,價錢寫得唔清唔楚。
不過見個咖哩飯只係35蚊,其他嘢應該唔會貴得去邊。
由主子拍板,叫咗個冬蔭功湯,足二至三人飲。
叫咗個辣椒豬肉炒河,見牆上雜誌介紹,佢地有泰式闊河粉,所以我地都指定要用闊河粉。
睇份報導,因為香港粉麵廠唔供應闊河粉,佢地就要求供應商原塊河粉送過嚟,佢地自己落手切。
要個黃咖哩雞肉飯,碟白飯大大碟。
仲有碟炒芥蘭。
食物味道如何?
好有泰國街頭小店風味。
冬蔭功夠濃,黃咖哩夠甜,炒河都算夠鑊氣,芥蘭菜不過不失。
佢地有樽裝可樂供應,唔駛講,一人一支。{:soso__11527146916266611047_2:}
去親泰國曼谷,一定會搵間地道小店幫襯。
呢度嘅泰籍女店員都好悠閒,冇人要招呼時,一個打瞌睡,一個追泰文小說。
兩個泰籍廚房猛男間中走出嚟抖下氣。
完全係泰國見到果種情境、果種風味。
唯一唔同就係唔駛指手劃腳,兩位侍應都識聽廣東話。
佢地有午市套餐供應。
炒金邊粉、咖哩飯等,38蚊送樽裝可樂。
湯河就32蚊,同樣送可樂。
供應到下午五點!
唉,蝕底咗,早三個字到就掂晒。
雖然唔可以慳多幾蚊,不過埋單都係151蚊,食唔晒,我仲帶走半碟咖哩飯。
咪見佢地班人外表懶洋洋,收錢果陣好有禮貌,係雙手接錢,泰國人的優良待客之道表露無遺。
鋪裡面牆上貼咗好多小菜相,下次可以試下。
離開時,見隔籬達X開市,門外排晒隊。
心諗:香港人係唔衰過唔心熄。
好似仲未提間泰國食店叫乜名?
金龍泰美食
地址:大坑銅鑼灣道96號A地舖
唔記得影相,以上相片均是自網上借用後加工,偷用相唔敢太過份,請見諒。
|