佐敦牛屋餐廳

和老虎在佐敦行街街  午飯時間 老虎話去飲茶 我話飲左咁多日茶  不如食第二樣喇  

眼前就見到厘間 見左最少都有二三十年嘅 “牛屋餐廳” 但我都未幫襯過 可以在這裏咁耐 應該都有D辦法嘅 就入去試吓乜料先

我隻老虎叫左個48蚊嘅 “紐西蘭肉眼扒” (要蒜蓉汁)
我就要個 “黑椒羊扒拌牛柳” 68蚊 (要黑椒汁)

餐廳內佈置 仲係原用緊70年代款式 又幾懷舊喎

先上餐湯羅宋湯 味道正常 水準之內 個湯餐包賣相超衰

湯餐包連牛油都唔跟  幫你搽埋  可以慳番粒牛油 同埋搽牛油嘅時間 不過個湯餐包樣衰衰又幾好味喎

這個老虎的 “紐西蘭肉眼扒配意粉” 一攞埋嚟個賣相都話晒比我聽 你仲唔瀨野

我的 “黑椒羊扒拌牛柳” 單單睇吓拼碟果pat椰菜同脆肉瓜 黃禁禁 就可想而知厨房對出品的誠意去到邊

一塊薄牛扒充份展示出港式豉油西餐風味  個厨房佬一定是茶記出身  醃肉過程 咪同我亞媽醃鹹蛋蒸豬肉手法和用料同出一徹

到插吓件羊扒  我都唔知這是羊乜嘢位置  肉與肉中間有條軟骨  鋸都鋸唔開要用五爪金龍揸住嚟食 味道如何 如果我唔係知有羊扒  我唔會估到這件係羊囉

果個十九"麵撈"黑椒汁先搞野 ［"麵撈"是行內術語.一個用牛油，麵粉，食油.....預早打好的漿狀物體，用來調校各種獻汁］可以係黑椒汁或蒜蓉汁  都係厘個汁  佢又無呃你喎  個汁黑椒 蒜蓉兩樣都有  將我老虎個紐西蘭肉眼扒 (要蒜蓉汁) 同我個黑椒羊扒拌牛柳 68蚊 (要黑椒汁)對比一下  你都會笑左出嚟

我最初以為包飲品 原來無論冷熱飲品都要加三蚊  老虎話佢老土 唔忿氣咁都要加錢 妖！三蚊比佢喇

睇下個牌 菜蜜竟然要加五蚊 我做茶記時一樽菜蜜來價十五蚊  一支豉油樽咁大嘅菜蜜  沖八杯至十杯左右熱飲  賣十蚊杯菜蜜  倒落杯沖水賣出去  20秒內完成  乾手淨腳  我果時成日話  個個都飲菜蜜就發達喇

埋單重要收加一  135元埋單 果D待應以前應該喺碼頭做咕喱  好Q串下  落單盤問一樣  未食完就問飲乜  一食完閃電收碟  完全做到食完唔該快D走態度

唉 都唔知點解咁嘅味道 咁嘅服務的 “牛屋餐廳”  可以撈左咁多年  我又突然懷疑我係咪行緊衰運呢  厘排D食運 同骨運都咁差嘅

尼間餐廳我都有路過，原來同以前屋村d西餐廳差唔多水平？
係咪買鋪位架？唔係就真係幾難涯。

呢類咁既舊式豉油西餐廳
可能係去一次炳一次
不過就耐不耐想去幫襯番次
無他，懷舊囉
鬼叫o靚仔時代食慣左
以前一份鐵板餐十幾蚊份，已經係自己消費能力的極限
學你話齋，個汁係校定，肉係醃得好透
記得呢類餐廳的意粉，一般都係煮到淋晒
食慣左，攪到當年去食正宗意粉時，唔慣咁彈牙
仲要大出洋相，向服務員投訴D意粉"未煮熟"
呢類經驗，有時又幾回味
你話我自虐都好
睇完象版個報告，我覺得係時候去懷舊一下
最好臨尾黎個花奶什果啫喱做甜品，正呀！

去呢D餐廳, 都係食個情懷...
基本上真係無幾多間好食.

大象版主,我深表同情,希望下餐好得!

ryohung0077 發表於 2012-4-24 09:54

                               
登录/注册后可看大图

尼間餐廳我都有路過，原來同以前屋村d西餐廳差唔多水平？
係咪買鋪位架？唔係就真係幾難涯。 ...

好一句 屋村d西餐廳差唔多水平 完全將小象詞不達意的意思  一矢中的{:soso_e179:}

chulo2009 發表於 2012-4-24 10:45

                               
登录/注册后可看大图

呢類咁既舊式豉油西餐廳
可能係去一次炳一次
不過就耐不耐想去幫襯番次

其實我都賣過豉油西餐  小店開業時"鐵板牛扒"十分盛行{:soso_e182:}   塊鐵板係一隻牛果個牛代厘  你記得嗎？
"口者 喱"我依家間中都有自己整嚟食架{:soso_e102:}     花奶一定要多 "口者 喱"先夠滑{:soso_e124:}   又可減輕甜味   我一口氣可以食三四杯{:soso_e128:}

tok 發表於 2012-4-24 12:20

                               
登录/注册后可看大图

去呢D餐廳, 都係食個情懷...
基本上真係無幾多間好食.

"金鳳"已算是同類鋸扒餐廳之首{:soso_e112:}

象版、你吾睇下你最後張相個持別介紹{:soso_e120:}

                               
登录/注册后可看大图

真係有我讀中學果個年代的感覺，
記得第一拍拖就係去呢度，
當時的西冷牛扒餐加凍飲係免費的，
仲有送好似朱佬版所講的花奶者里，
當年兩個人埋單約40蚊左右，
依家睇落可能覺得好抵，但當年已經係我兩日的飯錢，
最慘的係食完果餐無耐，先知道她原來係私鐘妹一名，
真係一鶴眼淚，人財兩失！