正骨101之「初哥入門手冊」

係人都有佢嘅第一次。

包括去揼骨。

我之所以出呢個帖，係因為見過好多初哥朋友，喺冇人教路之下去揼骨，好不知所措，尤其係當冇朋友陪同，想問又冇得問，好容易做咗傻仔。

我呢個帖係俾初哥睇，希望對大家會有幫助。

如果我呢個資深傻仔(佬) 有邊處寫得唔啱或者有遺漏，請各路師兄們指正。


第一章：準備篇   

~ 上深圳揼骨要準備咩嘢？

準備好心情囉。

證件、銀兩當然要啦。

有虎之士可能要攞定假紙。

仲有嘅係諗定去邊處揼。

好多人鐘意過咗關至決定，不過我唔建議初哥咁做。

最好係先做定功課，譬如研究下地區、價錢、服務特色。

上嚟vshare溫下書，資料庫同深圳正骨BETA區都有好多有用資訊。

仲有睇下報告，打定個底，咁就會揼得輕鬆D啦。

~ 好麻煩？想瀟灑D？

得，等你唔再係初哥先啦。

相信最令初哥困擾嘅，係唔知點分辦邊間係正骨、邊間係斜骨？

好易啫，vshare正骨區介紹親嘅都係正骨場。

但正骨場都有分純正骨同埋有得捉鼠嘅場，仲有D係一國兩制嘅場。

~ 唔明乜嘢係捉鼠同一國兩制？

要明嘅就一定明，唔明嘅就疊埋心水揼正骨啦。

~ 仲唔識得點分辨正斜骨場呀？

算啦，你都係想搵藉口俾自己啫。

可能你係鐘意羅文果首《 前程錦繡》

（唔係講許志安果首呀！真係有代溝……）



俾個藉口你：去多幾次，正斜場都見識過，咁咪識分囉。

第二章：交通篇  

比較熱門嘅場，都會有免費專車喺關口接送。上車地點要視乎個場所在嘅區域。

羅湖區：接送點在羅湖關口交通樓。

自2011年4月起，政府不許骨場接送車在一樓地下停泊，因此，各場所改變策略，將所有車身公司名字去掉，並拆走車位上的廣告牌。想坐免費專車，最好向相關場所或駐場接待員查問接送車所在。場所電話可到深圳正骨beta子版內尋找。



出咗關，喺地面果層轉右，行前少少再轉右。

去到返港離境嘅行人電梯位置，就係交通樓所在。

如果到咗果邊仲見唔到D專車同接待員，唔好去揼骨啦，你好快D去驗眼。

凌晨一兩點後梗係見唔到啦，如果有接待員招呼你，你快D搵個師父幫你驅驅邪。   羅湖收關後，果度冇車架啦！

有幾間場喺交通樓有鋪位做接待處（因政府封殺，目前已改頭換面，以商店名義繼續經營，如花店、士多、茶葉店等），如果果D唔係你嘅目標場所，唔駛擔心搵唔到你要嘅專車。

路在口邊，開聲問停車場上疑是骨場接待員嘅阿哥阿姐（俗稱拉客仔、拉客妹），又或者問下死纏住你嘅阿哥阿姐，對方點都會好樂意回答你。

記住，除非你係亦正亦斜，又或者外正內斜、名正實斜，否則你要堅定意志，喺必要時向對方說「不」。

如果俾人昆咗去打機，咪話我冇事先提你。

~ 打機係乜嘢？

扮純情唔緊要，但唔好太過份。

如果真係唔曉嘅話，唉，我都無話可說。

福田區：接送點有兩個，分別在皇崗同福田口岸。



福田口岸嘅候車區就係出咗口岸大樓後過馬路後位置，即係茶餐廳對出。

跟羅湖果邊一樣，收關後就唔會有車。

呢邊冇乜停車位，唔係每個場都會有車喺度接送，最好係預早查清楚。

要往皇崗口岸嘅候車區，出關後上天橋，到十字路口位轉右，直行到尾，最後一行社會通道就係候車區。



皇崗係廿四小時通關，午夜後嘅所有專車都係嚟呢度載客。

唔係所有場都會有專車等候，尤其係喺福田口岸同皇崗。

午夜後，好多羅湖場唔會派車到皇崗。

搭車係免費嘅，亦唔駛俾小費。

如果到咗骨場，但想先喺外邊醫肚，得！

喂喂喂~~~！唔可以一落車就走咗去架！人地有權收你錢。

唔想俾車費，就先到前台，放低按金，咁你就可以慢慢飲飽食醉至番入去按摩啦。

溫馨提示：

為確保有車接送或者唔駛等太耐，最好過關前或剛過關，預先打定電話叫車。

羅湖同福田口岸附近都有幾間場，行過去就得，慳番唔少搭車、等車時間。

第三章：更衣。桑拿篇

~ 直接入場，步驟係點？

先攞匙牌…唔駛自己摷，咨客會主動遞俾你。

叫咗你唔好亂摷啦，D匙牌點會喺咨客件衫裡面吖！

跟住可以入更衣室。

喂！唔係果邊呀！咪搏懵，男賓部喺另一邊。

入到更衣室，好彩嘅話有LOCKER仔幫你開LOCKER，

唔好彩嘅就自己按匙牌號碼搵啦。

除衫除鞋…

繼續啦，唔好停，除埋條底褲，咁怕醜點得架？

要鎖LOCKER啦，有冇嘢要隨身架？

手機、煙仔、DOMDOM…

咦？帶嚟做乜呀？你真係信晒D報告以為會有得玩？

你咁堅持，隨你囉，唔介意運桔噤運就得。



~ 銀包駛唔駛隨身？

兩睇囉。原則上，場內消費，到埋單至需要俾錢，不過如果你認為有需要即時俾現金咪帶囉。

其實淨帶現金都得，D囡囡冇碌卡機幫你碌信用卡。

~ 你問我乜嘢情況需要用現金？

小朋友，咪問咁多，啱啱學人嚟揼骨，要一步一步嚟。

~ 將貴重物品放喺LOCKER安唔安全？

最貴重嘅老二當然要隨身啦… （小朱 ：多謝大佬！）

其他嘢… 大場應該信得過，細場會有些少風險。

如果係旺場，無論大中細，都應該信得過。

骨場俾人偷錢嘅事係發生過，不過愈來愈少聽到，D場主緊張過你，佢地都唔想個朵臭晒。

睇住LOCKER仔鎖好個櫃，攞番個匙牌至好走。

~ 坦蕩蕩咁走？

怕醜嘅，攞條毛巾圍住至走囉，橫掂去沖涼都要用毛巾。

喂喂喂~~~！唔係叫你包到木乃伊咁嘅款呀！



你想浸下池，焗下桑拿？得，不過都要先沖涼。



文明人，要講衛生，要沖得乾乾淨淨。

皮膚有事就唔好浸池啦。

其實皮膚有事都唔應該嚟揼骨啦！！！ :y-29:

沖涼前，將D隨身物品，鎖入保管格度，咁就唔怕整濕啦。

~ 果D保管格喺邊？

自己問人啦。

洗完白白，浸夠兼蒸夠啦，可以去二次更衣區著番衫。

但記住攞番保管格裡面嘅物品，尤其係個匙牌。

好多場都有一次性內褲供應，不過要留意駛唔駛另收費，大場一定係免費供應。



~ 要唔要著？

自己決定啦，著咗感覺上衛生D，不過可能稍後會冇咁方便囉。

想兩全其美？可以著咗先，到差唔多有需要，咪走去除咗去。

喂喂喂~~~唔係叫你喺大庭廣眾除條紙底，去洗手間攪掂啦。仲有呀，記得著番條面褲。



又有嘢唔明呀？有乜唔方便？點解要除紙褲？

算啦，當我冇講過，你鐘意著又得，唔著又得。

唉，冇眼睇，唔駛錢啫，都唔駛著夠兩條架，你估係英國番茄咩。

好，可以離開更衣室。

溫馨提示：

有D場喺更衣室裡面有擦背服務。

所謂擦背，係用毛巾幫你去老泥同死皮，但不限於背脊，而係手手腳腳、前前後後都擦。

當然要收錢架啦，價錢一般跟大堂按腳差唔多。

記住簽小費呀！

第四章：大堂篇

呢位初哥同學係咪有嘢想問？

~ 係咪一定要到大堂坐？

問得好。

答案係：當然唔係啦。

你可以要求直接入房揼骨。

我經常趕頭趕命，都成日咁做。

不過，嚟得揼骨，可以嘅話，應該悠閒一D。

送生果飲品已經成為深圳骨場必備服務。

對初哥嚟講，就算冇打算做大堂服務，我絕對鼓勵先到大堂坐一坐。

你都要知道間場有乜嘢服務、收乜嘢價錢、有乜嘢優惠得架。

坐低攞個消費牌研究一下，唔明就一定要問…

唔係問我，係問服務員。

今時今日，好多場都有大堂項目送。

深圳骨場行小費制，免收費並非免收小費，唔好咁大鄉里呀。

~ 有乜嘢大堂項目？

我唔打算喺呢個帖介紹，有機會兼有心機，至考慮再整個服務介紹，又或者留番俾其他師兄講講。

溫馨提示：

生果一般係任食，但飲品一般只限一杯免費。

有D場送夠兩杯，亦有D場唔係種種飲品都會送。

留意清楚，以免駛咗無謂錢。

依家D場每個位都有獨立電視，大家可以隨意選台觀看。

記住，文明人做文明事，唔好將電視音量校得太大，以免騷擾他人。

如果你係撞聾，唔該戴番個助聽器。

第五章：飲食篇

每個場都有收費飲食供應，有D係叫外賣，有D係自己有廚房。

有好多場都供應自助餐，仲要係免費或者特價供應。

亦有D場按時段送餐一份。

精明嘅消費者可以度準時間入場，享用最多嘅優惠。



第六章：全身按摩篇

全身按花款好多。

傳統嘅有中式、泰式、港式、日式。

我亦都唔打算講解咁多。

要提嘅就係正場同斜場對港式嘅定義係唔同，咪見人地有港式就妄斷係斜場。

依家D花式越出越多，多咗不同名目嘅乜乜風情，講都講唔晒，留番初哥們自己慢慢探索。



溫馨提示：

傳統嘅雙鐘係120分鐘計，但依家好多只係計90分鐘，加鐘即係加45分鐘。

技師入房後用電話報鐘，即係開始起鐘。

到鐘前，電話會響，提醒技師就夠鐘。

如果佢同你講已經夠鐘，其實佢係呃你，因為個電話一般會喺到鐘前5分鐘響，佢只係想偷懶啫。

其實技師係唔可以提早落鐘，除非係個客主動提出，所以佢呃你5分鐘，佢都唔可以立即去報落鐘。

第七章：點技師篇

幅相係我偷用嘅，吉野大佬千祈唔好報警拉我

輪牌、點鐘、CALL鐘。

所有當值技師會在技師房等候上鐘。

冇相熟技師，又冇目標技師，自然要輪牌。

輪牌就係按佢地公司安排，技師排隊上鐘，落鐘後再到隊尾重新排過。

無論係大堂定係全身，按摩手勢應該係最重要。

不過如果你認為視覺上嘅感受應該擺喺第一位，你係有權換人嘅。

鬼叫你係客咩！

作死咩！按咗一段時間至叫換人，換你條命！

各位初哥都係醒目仔，好可能已經喺vshare做定功課，袋住咗一堆號碼。

你可以唔輪牌，直接向服務員點你嘅目標技師工號。

~ 技師嚟到，佢唔啱你？

喂！人係你點嘅，要換人就過份咗D喎！

點鐘未必一定點得到，對方可能冇上班，亦可能上緊鐘。

上緊鐘唔係太緊要，你可以問下對方仲有幾耐落鐘。

~ 你唔知個技師電話問唔到？

我係叫你問服務員呀！佢會幫你查。用下腦啦~~~~

如果對方就快落鐘而你又唔趕時間，你可以先點咗佢鐘，佢落鐘後就輪到你上囉。

不過，咪咁大安旨意住，對方嘅客有權加鐘，到時你冇得上鐘，唔好向服務員發爛渣。

最穩陣係做CALL鐘，預早book定技師。

喺未入場之前，先打電話俾技師，話同佢做CALL鐘。

對方一般都願意接受你嘅call鐘，除非佢已經落咗班，又或者休緊假兼瞓緊覺。（同邊個瞓好似唔關你事喎！）

佢會同鐘房講聲，講低你貴姓。

如果你跟手就會進場，你位技師會唔上其他人鐘，專誠等你。

不過呢招對初哥會有D難度。

~ 你未有對方電話，又點做call鐘呢？

你可以打去間場度，表明想call某某技師嘅鐘。

呢個方式點都冇直接聯絡技師咁好。

佢有權唔接受。

點都好，做CALL鐘記住要喺進場前做，否則只係當點鐘。

所謂進場，就係當你攞咗匙牌就當你入咗場啦。

~ 點鐘同CALL鐘有乜嘢分別？

原則上對客嘅分別唔大，但對技師嘅分別就比較大。

有好多場，技師每月有call鐘任務，達唔到目標可能會被扣工錢。

另外，做CALL鐘客，一般小費冇上限，技師有機會賺多D。

你可能從此推斷到，做CALL鐘時技師服務會好D。你真醒目…

不過咪懶醒目住，凡事冇絕對呀！

講CALL鐘，可能暫時未係時候。

現實D，再講番點鐘。

今時今日，所有中大場都有技師相片俾你參考。

傳統D嘅，會將技師相貼喺牆上，你睇啱就同服務員講。

不過好多場都安咗電腦點相機，資料詳細好多，通常會有埋姓名、年齡（信不信由你）、籍貫、服務種類、上班或上鐘與否、仲有幾耐落鐘等。

D相藝術成份好重喎！

冇錯，有時候有相睇不如冇相睇，千祈唔好期望過高。

如果真人有幅相嘅八成，你咪當中頭獎囉。

~ 只係得幅相嘅兩成？

人生不如意事常八九，正常吖，仲唔快D除咗副眼鏡，費時眼冤。


第八章：小費篇

深圳骨場係行小費制，即係話技師嘅收入主要靠小費。

客人有權唔簽小費，但對方又唔係冇服務，唔簽小費係咪太過份呢？

~ 簽幾多至夠？

對技師嚟講就多多益善，對客人嚟講梗係認為少少無拘。

正骨場為防有個別技師為咗多收小費而提供額外服務，所以都規定小費有上限。

大堂單鐘上限一般係30至40不等，全身雙鐘一般不超過100。

你簽多咗佢地都收唔到。

一般加鐘後，小費上限係會提高，你依家明點解D技師係咁問你加唔加鐘啦。

~ 我好似仲未講簽幾多至夠喎？

小費應該同服務水平成正比。

當要你簽小費時，你可以睇下張小費單上預印小費金額係幾多。

一般而言，小費單上有最少三個選擇。

銀碼最低果格係技師預期收到最起碼嘅數字，除非服務唔掂，大部份人（女性客人除外）都唔會剔呢格。

~ 即係幾多至夠呀？

唉，我已經一路喺度兜圈，想迴避呢個問題。

冇辦法，只好俾個參考數字你。

大堂單鐘中間價係15至30，視乎個場嘅級數。

全身雙鐘中間價係40至60。

唔好俾其他人影響你嘅消費決定。

簽幾多自己話時，最緊要係有品。

你可以喺張單上手寫你想簽嘅銀碼。

特此鳴謝rstfung師兄提供額外資料，老朱已將資料加入原文。為配合原文，已作簡略編輯。

第九章：過夜篇



有師兄問乜野時間進場至可以過夜？

其實任何時間進入均可以過夜。

分別是如果你在指定時間 (每個場不同) 後做了指定鐘數的全身按摩，你便可以在按摩房內的床睡。

否則便要在大堂的按摩椅，或到睡眠區睡。

有D大場有免費睡眠區，不過當然係先到先得啦。

你亦可以喺大堂休息廳搵張梳化椅嚟瞓，佢地好多場都會有被褥供應。

如果想留喺按摩房裡面瞓，你就要問清楚最少要按幾多個鐘至可以留房過夜。

一般嚟講，要留房過夜都要過咗午夜某個鐘數至得，遇正周末旺場，隨時未到凌晨三四點都冇得俾你KEEP住間房。

呢排深圳政府定咗新規矩，午夜後入場要登記證件。

呢個係短期定係長期措施，就要放長雙眼睇下啦。


第十章：其他服務篇

好多場冠名為休閑中心，即係俾客人嚟慢慢攤抖。

所以，除咗揼骨，仲有其他娛樂設施，包括：泳池、健身、遊戲機、電腦上網、桌球、乒乓球、電影院、卡拉OK房。

講開電影院，有大眾影院，仲有雙人影院。

前者係有大銀幕，大家可以一邊做大堂項目、一邊免費睇下戲。

後者係喺獨立房裡面睇戲兼做大堂項目，房租要另付。

無論係大眾影院，定係雙人影院，好多人都唔係想睇戲，而係貪佢地夠暗或者私隱度夠高。

~ 即係做乜野？

只要唔犯法，又或者犯咗法而冇俾人捉到，咁你做乜都得啦。


第十一章：又係更衣。桑拿篇

要離場自不然要去換衫。

好多人鐘意走之前去浸一浸，或者蒸一蒸。

其實按摩前定按摩後至浸池同桑拿係冇硬性規定，以我為例，我係慣喺於按摩後至去蒸。

不過大家要記住，浸池之前一定要先沖身，又係果句，文明人做文明事。

喺好多場，LOCKER仔嘅服務係喺你要換衫時特別殷勤

無他嘅，因為收小費嘅時間到。

LOCKER仔嘅小費跟技師唔同，冇得簽單。

一般俾10蚊就得，你當然有權俾多D啦，小費係眾LOCKER仔大圍分，所以係冇必要逐個人派。

但你要咁做都冇人會阻止你。

由於要俾現金，我建議你預早確定有散紙，又或者入場時，在前台換定散紙。

第十二章：結帳篇

到咗大堂前台，會有人招呼你埋單。

一般來說，多數場都會收淨桑拿費，即入場最低消費，包你在場內24小時活動。

如你沒有任何其他消費如按摩或進餐，只要付這個價便可在場內呆24小時。

淨桑拿費通常會包一杯飲料和水果。

如果你消費滿指定金額(一般是等同一個雙鐘全身按摩的價錢)便可以免淨桑費。

埋單時，絕大多數場都收港銀，視乎兌換率係幾多啫。

除咗俾現金，好多場都會收銀聯咭，甚至信用咭。

我建議大家俾錢前先睇睇單。

大場同埋好多中場都會有加一收費，但加一唔應該計埋技師小費。

有D場會有特別時段折扣優惠，但技師小費係唔會有扣除，咪大鄉里，同人嘈啦。

喺埋單果陣，可能會有異性物體過嚟逗你出張會員咭或VIP咭之類。

著數就一定有，不過最好了解清楚，睇下啱唔啱自己需要，唔好俾人電兩電就乜都肯制。

最後，如果間場有專車接送，你可以坐佢地嘅車到指定關口。如果趕時間就要問清楚幾時有車。


結語

要講嘅基本上已經講晒，大家對初入骨場嘅步驟規矩都應該了解。

冇講嘅嘢，留番俾大家自己去摸索。

好！大家可以放膽去實習。

不過記住要交功課。

~ 交乜嘢功課？

當然係指出報告啦。

祝大家可以揼番個靚骨，兼且順利得到意外驚喜！

一個字”強”呀．．．解釋得非常清楚！

比我呢ｄ新手睇就岩晒，等我唔洗盲摸摸，辛苦晒！:em17:

睇左朱佬個詳盡介紹,BB以後都唔駛跟住大人,
可以自己搵食啦？唔該啊.

超版真係醒.:em17:
我提議轉去主版重合.

朱兄出親報告都造福萬民... :em17::em17:

正骨101好適合我呢類初哥睇喎, 多謝豬佬!!