本帖最后由 beautylady 于 2010-4-29 23:56 编辑
之前來過7+3無數次,都有同CHING與C姐參加過7+3試食活動,估唔到又咁快相聚。
vshare與sofood的好多會員都系7+3的常客,呢度的裝修及擺設、環境及氣氛都唔使我多言,大家比我仲了解。
來到呢度,冇非系為咗睇波、飲酒及食燒烤。的確,呢度氣氛好咁一班CHING與C姐一齊睇波食嘢飲酒。我哋試食冇得飲酒,呢個系試食團規矩。
好啦,下面系我哋戰績:
我最鍾意呢度的燒汁讓茄子。我本身對茄子系過敏的,但對呢度的茄子唔會,我一直都好奇怪,難道呢度茄子與其他地方唔同。事實真的唔同,因為我食咗之後唔會喉嚨唔舒服,而且會令我越食越想食。D燒汁唔會像其他地方燒得好濃或者有焦味,佢煮得啱啱好,鹹淡適中,雖然甜咗少少,但為咗整體味道均勻,呢個甜的程度不為過;肉碎都比較香,應該炒過。來呢度食嘢,呢道菜系必點。值得推薦!
泰式豬頸肉,呢道菜真的系意料之外。之前系呢度食過,果時成道菜的味道同依家系冇得比,依家改良咗好多,系我食過最好食的一次。睇樣,裝盤、切法都比較靚。皮較脆,肉較嫩,有D汁,食起來仲有少少彈牙。要做到呢種外皮脆並能鎖住肉裏面D汁,廚師要有一定功夫。呢道都系——讚!
呢間主打系海鮮燒烤,呢度海鮮燒烤可以話系平、靚、淨。呢次我哋點咗:蒜蓉燒蠔、烤串蝦、東北烤秋刀魚及東北烤茄子。呢次的生蠔唔算大只,但新鮮,加上蒜蓉,都好香。烤串蝦用的系基圍蝦,睇樣都幾大只,烤得外脆肉嫩,搞到我邊殼都食埋。廚師有料!秋刀魚,我系海邊長大食慣天然海鮮,所以對食魚都有少少要求。呢度的秋刀魚,試過幾次,呢次都系一樣,魚唔夠新鮮,烤得唔入味,而且魚肉較老,所以唔好味。烤茄子,呢個都系一道考廚師的功夫的菜。系好多地方食過烤茄子,都系比較多油,但呢度的烤茄子系唔見油的,唔信可以睇相。大師果然系大師,烤出來的嘢就系與眾不同。海鮮燒烤,唔錯!
呢間依家仲推出好多新菜式:木桶金針菇花蛤、木桶沙薑焗豬手、阿香婆烤魚。木桶金針菇花蛤、木桶沙薑焗豬手呢兩道菜,我覺得系比較好味的。花蛤雖細粒,但飽肉且新鮮,較鮮甜,木桶內有加熱,即使系冬天都唔驚花蛤有腥味。木桶沙薑焗豬手,豬手煮得啱啱好,唔會太淋,有咬勁,但又唔會太硬,加咗沙薑,但薑味唔會太重,好味,食起來有質感。呢兩道菜都系值得推薦的!阿香波烤魚,呢道菜,我就覺得唔好味了,可能系我食唔到辣。呢道菜又辣又麻,我食一少塊肉就成個嘴都麻咗,根本食唔出魚的鮮味,仲有魚有好多骨,估計用的系草魚。如有下次,我系唔會點呢道菜的。
茂名化州香油雞,呢個都系招牌菜,但呢次水準下降咗。雞肉好HAI,可能系雞本身唔夠新鮮,入口有了陣藥味,沙薑冇發揮到作用。呢道菜——彈一下!
猴頭菇龍骨湯,呢個湯煲得夠火候,湯較濃香,可能系加咗鳳爪,所以湯有少少粘度,飲起來有少少膠質感。
黃鱔田雞沙煲粥,之前食過呢度沙煲粥,覺得唔好,都好懷念的。但呢次令我好失望,黃鱔與田雞都處理得唔好,我估黃鱔應該仲未放完血就挪去煮,田雞一D鮮味都冇,而且成煲粥應該煲唔耐。雖然呢次差咗好多,但如果肚餓都可以頂住先咯!
薑汁芥藍,青菜一個,冇乜特別。
東北捍手麵,成晚最差一道,可能系我唔鍾意呢種東北口味,無法評價。
整體來講,呢道大部分菜都保持一定水準,而且不斷改良。
評分:
味道***
服務****
環境****
價錢*** |