以前o係大陸o既中,高檔飯店食得多, 近年反而多o左去d街坊食店搵食.
無他, 唔想行番香港人以往條路(追求門高狗大撚花腎)~~~~
今次有位虎門朋友推介呢間"茶葉全"街坊食店, 個老闆睇住我朋友大, 睇住佢結婚生仔!!~~~~
由於小弟遲到o既關係, 一埋位就有o野食, 正!!~~~
豬雜湯
唔洗多講啦, 新鮮到不得了o既材料, 除o左鮮甜之外, 其他形客詞都顯得有d多餘~~~
不過特別要講o下o既係個豬潤同豬爽肉~~~~
唔好睇個豬潤偏深色, 裡面起晒沙都唔止, 仲鮮甜非常.
個人覺得比得上香港灣仔生記!!~~~
用爽肉滾湯, 我都係第一次見(可能係小弟見識少),
新鮮, 爽口, 冇渣, 死未!??~~~
臘鴨腸蒸水蛋
除o左睇到蒸得靚之外, 一食入口仲不得了, 估唔到兩種食材撞埋一齊會有咁好o既效果!!~~~
臘鴨喉蒸水蛋我都食過, 但呢個真係好唔同, 但臘鴨腸陣味冇臘鴨喉咁霸道,
因為臘鴨喉有埋個胃, 當中個啖肥油真係香到不得了, 但就會蓋過o左d蛋香!!~~~
呢個水蛋, d蛋好滑, 仲吸收o左臘鴨腸o既香味, 而臘鴨腸又豐富o左水蛋o既單調, 真係好o野!!~~~
最終我地嫌一碟唔夠喉, 追加多一碟!!~~~
臘鴨腸被切成一段段仔, 可以一口有蛋有腸, 正!!~~~
要o黎撈飯, 真係連我唔多湊米氣o既人都食o左兩大碗!!~~~
清蒸游水海魚兩條 - 海鱸 + 黃腳(魚立)
兩條魚除o左鮮甜, 我都唔識用咩o黎形容, 大家睇相啦不如~~~~
但無可否認, 條海鱸(左)係正d!!~~
浮皮蘿蔔炆牛筋腩
呢個最失望, 雖然個味好好, 蘿蔔又甜, 浮皮(豬皮)又吸汁,
但個牛腩仲未炆得夠時間, 唔夠稔, 吹漲~~~
但唔知點解, d牛筋有ok喎, 有多少咬口, o岩我!!~~
燒肉炒豬(也母)菜
冇咩特別, 係香港少見d咁解!!~~~
總括而言, 烹調冇咩花巧, 實牙實齒, 以新鮮同傳統整法為主.
短期內, 呢間又會係小弟o係虎門o既家常飯堂!!~~~ |