食通天深圳系列（8）貴州酸湯魚館

返深圳搵食，川菜、湘菜、贛菜、滬菜～～～都食得多，至於黔菜就從未試過。今次去到呢間叫貴州酸湯魚館嘅餐廳，老闆介紹我哋食酸湯魚火鍋，當侍應將一鍋酸湯魚捧出嚟嘅時候，一陣陣好勁嘅酸味係咁飄埋嚟。

位置：福田區梅林路4號鴻運大樓二棟首層

酸湯魚算得上係貴州嘅地道招牌菜，做法來自苗族，所以又叫苗家酸湯魚。湯底係用煮過嘅米水，材料主要係蕃茄，將蕃茄洗淨晾乾，唔切開整個放入瓦缸加鹽（蕃茄：鹽＝10斤：1斤）腌泡15～20日，另外仲有木姜籽、貴州酸筍調味。

其實木姜籽係有啲竅妙，喺酸湯裏面煮下煮下就會發揮作用，可以令酸湯嘅口感變得更加醇厚，酸得嚟唔會嗆喉，辣得嚟唔會辛麻，味道酸中帶辣，有少少似滇菜個種酸辣嘅口味。




以前嘅食法係將魚肉放哂入去湯鍋加熱煮熟，但係浸喺酸湯裏面嘅時間太耐，會影響咗魚肉嘅鮮味，所以後來就改咗分開上檯，好似平時打邊爐咁樣食法，可以保持魚肉嘅鮮嫩口感。

因為魚肉係靠酸湯短暫加熱而入味，食慣酸辣嘅人會覺得味道好淡，咁就會用腐乳、芫荽、蔥花、辣椒醬再加上一勺酸湯攪勻成為特製嘅蘸水，類似我哋所謂嘅醬汁，點著嚟食更加有風味。

酸湯魚一般都係會用鮎魚，又叫鯰魚，坊間俗稱大鬍子魚，肉質嫩滑鮮美，加上即灼即熟即食，所以口感細膩而且仲好彈牙。將個啲配菜～蘿蔔、大白菜、凍豆腐放埋落鍋，真係愈煮愈入味。




貴州卷粉嘅賣相有啲似廣式豬腸粉，但係口感就冇豬腸粉咁滑。先將白米打成米漿再加入配料，倒入去一個大圓盤搖勻，然後高溫蒸熟。另外，卷粉又叫剪粉，即係將一大塊卷粉剪成一條條咁樣，加埋醬料撈勻嚟食。

這個酸湯魚火鍋口唔錯喎要去試一試

勁勁勁, 一次要试试

睇見都想食

Good hotpot.
looks delicious.

好似幾好味咁啵

好似好spicy 咁

賓州兄唔單止識食 仲識整添

看得肚子饿了

CHING...有无MAP啊...唔知点去个度啊