食通天深圳系列（6）菜香根酒樓

食通天深圳系列（6）菜香根酒樓

今次我所介紹呢間菜香根係湘菜館，起初我都攪錯，其實同個間叫菜根香嘅川菜館絕對唔同。

呢度有四層樓咁高，面積大約有3000㎡，裝修風格以「粉牆黛瓦」為主調，可惜位置較為偏僻，交通亦唔係太方便，好多人又淨係記得上手嘅老四川，反而對菜香根冇乜嘢印象，所以場內嘅生意亦只係一般。

位置：南山區科技園科興路10號（大中華百貨後面）

四道主菜～～～

砂鍋回頭魚
肉質鮮嫩而細滑，而且少骨仲啖啖肉，仲加咗紫蘇嚟辟腥，湯味更鮮，只係稍嫌湯汁太辣反而微微蓋過魚肉嘅香味。




榔芋蒸排骨
綿甜香糯嘅檳榔芋，吸收哂排骨滲出嚟嘅肉汁，鹹淡適中而略帶微甜，係少有唔辣嘅主菜，食完齒頰留香。




黃燜水豆乾
起初入口仲以為嚿嚿都係老豆腐，但係食落口感又幾細滑，加上係用高湯嚟煮，香濃滋味。




青椒燜臭豆腐
其實冇想像中咁臭，再加埋獨有嘅秘方，完全唔係街邊檔個種臭豆腐咁樣，非常香口又惹味。

其它各款美食～～～

黃悶豆渣
係一款地道嘅湘菜，而菜香根呢款屬於正宗邵陽嘅做法，口感細膩而且不糊不黏，最適合撈飯一齊嚟食。




松香豆腐
表面相當香口而酥脆，而裏面係嫩滑嘅日式豆腐，再配上鹹香嘅火腿絲，愈食愈香，味道確係唔錯。




蛋黃燜南瓜
將老南瓜去核、去籽再切條，表面黐咗一層薄薄嘅蛋汁，食落外層酥脆，內層清香而且唔會油膩。




五彩迷你粽
細細隻咁樣又幾得意，仲有陣陣清香嘅桂花糖，既香甜又可口。

紙鍋蕨菜
所謂蕨菜，其實係東北特產嘅山野菜，但係食起上嚟啲味道好似怪怪哋。




上湯豆苗
最普普通通、簡簡單單嘅一碟菜。

好似幾好食..........