佛山三水美食大特搜

古語有云：靠山吃山；靠水吃水。佛山三水位處北江、西江、綏江嘅交界，河產嘅品種、數量非常豐富，所以當地人都鍾意食河鮮，雖則煮法簡單而唔講究花巧，但係勝在風味夠哂清新，亦有鄉郊小鎮嘅風味。講到三水嘅河鮮，原來真係有好多品種，一般常見嘅河鮮有桂魚、鱸魚、鱘魚、鰣魚、清明蝦、花錦鱔、毛蟹～～～等等，另外仲有嘉魚、和順魚、龍鶪～～～等等係較為少見，最重要係當地嘅河鮮係全年都有得食。廣東人有「不時不吃」嘅習慣，而當地亦有一句「三月黃魚四月蝦；五月三黎燜苦瓜」嘅諺語，即係話農曆三月就要食黃魚，夠鮮夠肥；農曆四月就要食清明蝦，剛剛處於新舊交替嘅時候，新蝦仲未產卵而肉質先至夠爽夠嫩；農曆五月就一定要食三黎魚，而當地人所指嘅三黎魚即係我哋平時所叫嘅鰣魚，鰣魚一向都係以鹹淡水交界嘅地方活動，每到農曆五月就會游去三水一帶產卵，肉質鮮美而有獨特嘅甘香，用豉汁配紫蘇葉一齊嚟清蒸夠哂yummy！三水仲有一種罕見而著名嘅嘉魚，據講係300幾年前俾人發現，話說當年清仁宗（嘉慶帝）南巡廣東經過三水，負責御膳個位阿叔去到河邊，發現一種外貌樣衰衰而肉質又好好味嘅魚，食完都唔知條魚叫乜嘢名，嘉慶帝索性賜名：嘉慶魚。皇帝食過就自然出哂名，有唔少有錢佬但凡過節、陞官、嫁娶、賀壽～～～等等，都吩咐廚房要煮嘉慶魚。豈有此理，咁夠膽連皇帝都煮埋嚟食？後來啲人忌諱而改叫嘉魚。           



三水河鮮特產：

嘉魚
細細條咁樣而個嘴又似老鼠，最重頂多都係一斤多啲左右，最特別係魚鱗生喺魚皮裏面，而魚鱗裏面又有一層魚皮，肉質確係鮮嫩而幼滑。每年十月係當造嘅季節，但係要趁「枯水期」先至捉到。

三黎魚
即係我哋平時食開食慣嘅鰣魚，肉質較為細嫩而甘香，貼近表皮嘅魚肉係特別嫩滑，黐著魚骨啲肉較為粗，食起上嚟就有兩種唔同嘅口感。

清明蝦
清明節前後一個半月就換季，新蝦較為肥大肉厚、體型壯健，而且又未產卵，冇任何蝦籽嘅雜質在內，咬落口啖啖肉又爽又嫩。

石縫蝦
一般都生長喺水流較急嘅山坑、石罅，獨特之處在於蝦身係左右鴛鴦大細爪，靠食水裏面微生物為生，肉質較為結實而有口感。

佛山三水美食大特搜：田基美食

三水郊區有好多餐廳，門口招牌通常寫著「田基美食」、「珍奇美食」之類，究竟乜嘢係「田基美食」呢？所謂「田基美食」即係用鄉間田野嘅蛇、蟲、鼠、蟻、野菜～～～作為材料，煮出有獨特風味嘅佳餚。原來「田基美食」係近代起源於三水嘅地道菜式，當年「文革」三水一帶出現糧荒，有位叫鄧崇謙嘅小學校長，落田搵下有冇嘢食，連番薯都掘唔到，偏偏就搵咗好多蚯蚓、蟾蜍、桂花蟬～～～出嚟，迫於無奈都要炒埋一碟嚟食，只求填飽個肚。80年代生活水準有所改善，鄧校長仍然緬懷過去，靈機一觸喺三水白坭鎮開飯店，以所謂「田基美食」作為主打菜，最初都唔係咁講究，求其用油、鹽嚟調味，經過咁多年嘅改良，材料嘅品種、烹調嘅手法都多樣化。至於「田基美食」嘅材料，主要係「靠水而活」嘅生物與野菜，包括蚯蚓、龍蝨、土狗、桂花蟬、蠍子、竹象、蜂蛹、禾蟲、蝸牛、山坑螺、蟾蜍、田鼠、禾花雀、馬齒莧、野薄荷～～～等等亦擺埋上檯，本來係難登大雅之堂甚至有啲核突嘅材料，攪得兩攪又話係上菜，全部吞哂落肚。嘩！吊燒田鼠、油泡蜂蛹、油鹽桂花蟬、白灼蚯蚓、豉椒螺頭、冬瓜燜蟾蜍、椒鹽蟾蜍扣、蟾蜍粥、螞蟻煎蛋、滑蛋炒蠍子、椒鹽蛇碌、菊香蛇羹、禾花雀焗飯～～～等等，要幾古靈精怪就有幾古靈精怪，當地人仲食得津津有味，飯前一杯羅漢果茶、飯後一杯自釀龍蝨酒，幾個人去食呢啲蛇、蟲、鼠、蟻，一餐埋單約￥200～￥300之間，抵唔抵食又敢唔敢食真係見仁見智啦！

It is really great, thanks for your sharing, thanks a lot