三水臭屁醋

三水有一種地道風味嘅米醋，俗稱臭屁醋，以前三水家家戶戶都會買幾斤白醋返屋企，加水、加米、加醋入埕封蓋，擺喺天台或後園等米醋慢慢發酵，經過一段時間後開封，米醋變成米白色，鍾意嘅人覺得有一陣陣濃香，唔鍾意嘅人會覺得非常怨臭。當地人每逢煮米醋，整棟樓嘅人都會掩著個鼻問：嘩！邊個煲臭屁醋呀？左鄰右里甚至會問：喂！係咪煲醋呀？預埋我嗰份好喎？好嘅米醋可以生津解渴，飲完個口係唔會覺得鹹，以前從事體力勞動嘅人，返到屋企都有習慣煮米醋。

米醋味道係鹹得嚟帶啲酸，酸得嚟唔會寡，食時加埋炒香過嘅白豆、榨菜、指天椒、桂林辣醬，除咗豬骨、豬腸，有人鍾意加雞或鯽魚嚟煮米醋，亦有人鍾意加番薯，米醋味道會變得比較甘甜，甚實用米醋煮餸都幾好味。當年sars流行時，盛傳醋可以殺菌，於是三水家家戶戶都去飲醋、煲醋，結果有醋檔出現，好多阿嬸會喺市場、街邊擺車仔檔，男女老幼一齊坐低飲醋，我未食過街邊檔，曾經試過三水河口嘅新新食店，米醋算係比較正宗。間中食米醋原來有保健作用，特別係平時食得太油膩，食米醋有助消化，對防止血管硬化亦有幫助。

米醋喺唔同嘅地方有唔同嘅做法，但係以南海小塘最正宗，而米醋主要分為兩個工序：

材料：清水　50斤
　　　粘米　2斤
　　　糯米　2斤
　　　粗鹽　1斤

用一半粘米、糯米煮飯，另一半用嚟炒，炒至金黃色；同樣將粗鹽炒至金黃色；將飯、鹽、水一齊入埕，加蓋密封等米醋慢慢發酵，需時約100日。自家煮米醋，當地人有時會買（豬骨、豬腸、梅菜、白豆、尖椒、榨菜、薑）或（豬骨、大米、白豆、梅菜、花生、粟米、蒜頭），基本上係將豬骨、豬腸汆水，用薑爆炒，梅菜切細後又係爆炒，連同其它材料與米醋落煲煮兩粒鐘搞掂，可以按個人喜好，加辣椒絲或辣椒醬調味。

講到我都有D 口水流...
醋味酸,實情是碱性東西,所以吃醋並不會引致口腔發酸,和破壞味蕾感覺, 所以日本人吃酸薑, 蔡瀾教食梳打餅, 我會飲支天地一號(可惜天地一號糖精太多, 多飲未必有益)
把肉和骨筒的精華容了出來, 應該非常鮮味濃郁, 加上醋有令蒜容的香味在口腔內提升的特質,有機會去一定要試一下!!!

[ 本帖最後由 浪~ 於 2008-3-13 01:48 編輯 ]