尖沙嘴棉登徑〔豚王〕要排隊等食嘅拉麵

显示全部楼层 · 发表于 2012-9-2 16:32:16

本帖最后由賓州電鋸插人狂于 2017-6-1 00:00 编辑

最近〔豚王〕開咗新店，隱藏喺尖沙嘴棉登徑，紅色招牌都幾搶眼，當時舖外有十幾人排隊，等咗約40幾分鐘入座。

店內有30幾個座位，面積超過中環、銅鑼灣兩間舊店，牆上掛咗一幅「真心入魂」嘅牌匾，即係話佢哋用心製作拉麵。

檯上面擺咗兩盅配菜，辣豆芽與辣高菜都係俾客人任食，感覺幾爽口，淨食嘅話味道係比較鹹，比較適合放湯麵嚟食。

額外ORDER咗半熟蛋，睇外表好似無乜嘢特別，用筷子輕輕夾開，睇著啲蛋黃係半流心半凝固流出，微微甘香嘅口感。

我記得中環店只有4款拉麵，銅鑼灣店有額外2款隱藏版，而尖沙嘴店係有10款拉麵選擇，點菜嘅MEMO有哂詳細資料，可以俾客人自選湯底味道、濃度、香味、調味、秘醬，甚至連叉燒、配菜、麵種、軟硬度都係任意搭配。

我ORDER咗「魚王」呢款麵，豬骨湯底濃香，表面啡色粉末係鰹魚粉，將鰹魚粉拌勻後，頭啖湯有濃郁嘅魚鮮味，略嫌有啲油膩，將魚鮮味融合豬骨湯中係一種新嘗試，但魚鮮味微微蓋過豬骨湯味，尚有改進空間。

自選呢碗係「太麵」即係粗麵，比較平時所食嘅拉麵稍粗，彈牙而有韌性，至於配料嘅叉燒，可以自選肩肉或腩肉，腩肉嘅脂肪比例較多但厚薄適中，口感鬆化而腍滑，濃郁醬汁味嘅兩塊叉燒浸喺熱湯中頗有滿足感。

发表于 2012-9-2 20:22:48

排隊排40分鐘，師兄都幾有耐性喎
kt 有涸唔好習慣……就係唔鍾意排隊
所以有時真係食唔到好野！

另外還想問一句，埋單幾錢呀？

发表于 2012-9-2 21:48:44

成十款拉麵咁多，定能捒一到款自己仲意咯！
太麵我都like, 彈牙得来又带有筋道烟韌！

发表于 2012-9-24 00:00:49

佢好食定一風堂好食呢?

发表于 2012-10-18 18:48:31

一直都覺得...日式拉麵真係好到值得賣咁貴嗎？中式麵食賣貴少少就牙痛咁聲...

发表于 2013-10-1 02:59:59

呢間其實普通

发表于 2014-4-9 22:29:44

埋單幾錢？

发表于 2014-6-6 22:06:09

豚王的話，還是銅鑼灣較好

发表于 2014-8-5 23:15:52

沙田新城市都開左間, 不過感覺唔值100 蚊...

发表于 2014-8-10 17:28:05

看到流口水

尖沙嘴棉登徑〔豚王〕要排隊等食嘅拉麵

评分